آسـف أنا في جيتي لك تسـرعـت
ظنيت ألاقي فيك شيٍ فقدتـــــه
** ** ** ** **
كنت أحسبك مجـروح مثلي تولعت
جربت فرقى شخص قلبك وهبتـــه
** ** ** ** **
كنت أحسبك من مر جرحك تجرعت
حبيت فيك أحساس طفـلٍ لمحتــــه
** ** ** ** **
لو...قلت...آه بوسـط روحي توجعت
ولو شفت دمعاتك شعوري سكبتـــه
** ** ** ** **
ولو تطلب أعيـوني أبد ما تمنعت
وأعطيك قلبي لو بعد ما طلبتــــه
** ** ** ** **
وصلت بك..... أعلى مكان وتربعت
وفي قلب غيري يا الغضي ما وصلته
** ** ** ** **
وأصبر على صدك وأشوفك تدلعت
وأعطيك ود ومـا أظنك حسبتــــه
** ** ** ** **
أذهلتني بطباعـك اللي ... تطبعت
حتى قصيدي فيك أبد ما فهمتـــه
** ** ** ** **
لو كان غاياتك حروفي فأنا بعت
منك الشعور اللي بنفسي كتبتــــه
** ** ** ** **
خـل القصايـد تنفعك يـوم ودعـت
وأفرح بجرح الشاعر الي جرحته
** ** ** ** **
وأرجوك من صدك تراني تشبعت
خلك مع اللي عاجبك أو عجبتــه
** ** ** ** **
يكفي قهر في جيتي لك تواضعت
تركت غيرك لجل عينك وبعتــه
** ** ** ** **
ياليتني عن حب مثلك... ترفعت
ياليت قلبي قبل أعرفك دفنتـــه
** ** ** ** **
لكن أب أبعد دامني ما تولعـت
الله يرحم حبنا اللي ذبحتـــــه
** ** ** ** **
أنا شريت الود والحين أنا بعت
وأنا عطيتك قلبي اللي قهرتــه
** ** ** ** **
في يوم جيتك أطلبك ود وأقنعت
نفسي بأنك شخص عادي عرفتـه
** ** ** ** **
كمل حياتك مثل ما أنا توقعت
تبقى أسير الماضي الي فرضتـه
** ** ** ** **
ولا يحزنك أني جبان وتراجعت
حولك بدالي ألف شخصٍ عجبتـه
** ** ** ** **
أما أنا لا يمكن أخضع ولا طعـت
يحرم على أعطيك قلبٍ خذلتــه
** ** ** ** **
باريّحك من شوفتي يوم قاطعت
أسلوبك اللي به تجامل كرهتــه
** ** ** ** **
غلطان يا المقفي أنا ما تتبعت
غيري يتابع خطوتي ما تبعتـه
** ** ** ** **
ما ينحني راسي لو أني تقطعت
وما هو بنا من لا رميته لقطتـه
** ** ** ** **
وأن كان غرك حكي عذالي وطعت
الله يعلـم كيـف قلبي سكنتــــه
** ** ** ** **
اللي ملا قلبك علي وتسمعت
خله يعوض شخص مثلي خسرته
** ** ** ** **
أنا بما فيه الكفاية تولعـت
واللي بقى من قلب فيني حرقتـه
** ** ** ** **
وأن شفتني صدفة بعينك تطلعت
ذكرتني بإنسان غالي فقدتـــه
** ** ** ** **
بأول لقاء سلمته أحساسي وضعت
غلطت حياتي يوم قلبي سلبتـــه
** ** ** ** **
وأستسمحك في البعد كاني تراجعت
ما عاد أبلقى فيك شي نزفتــه
وسلامتكم
الثلاثاء يناير 13, 2009 1:13 pm
